أحمد أمين يكشف أسباب توقف «البلاتوه».. ويعلق: ما باليد حيلة

التحرير الإخبـاري 0 تعليق 0 ارسل لصديق نسخة للطباعة تبليغ

أعلن الفنان أحمد أمين، فى بيان نشره، اليوم الخميس، عبر صفحته الرسمية بـ"فيسبوك" عن توقف برنامجه "البلاتوه"، وقال في المنشور: "برنامج البلاتوه توقف؛ والحلقات المعروضة حاليا حلقات معادة، وداخلين على سنة كاملة تقريبًا ماعملناش حلقات جديدة"، كاشفًا عن سبب توقف البرنامج قائلًا: "توقف البرنامج كان بسبب قرار من قناة النهار لتعرضهم لبعض المشكلات المالية، والتفاصيل أنا مش عارفها".

وأضاف: "للأسف ده ترتب عليه حاجات كتير.. أولًا: اعتذرت عن كل الشغل اللي كان ممكن أعمله عشان عايز أتفرغ للبرنامج، وكانت القناة بتوعدنا كتير إننا راجعين لكن كلها كانت وعود وبس والله يعينهم على التحديات اللي هما فيها.. فبقيت قاعد في البيت مكبوت عندي حاجات عايز أقولها ومش عارف.. ولأني متعاقد مع القناة ما ليش حق إني أشتغل في قناة تانية".

تابع: "القناة بدأت تنزل إعلانات على المحتوى القديم بطريقة مسيئة جدا للمحتوى.. وطبعًا أنا اعترضت كذا مرة ومافيش فايدة.. فابتدت توصلني تعليقات سلبية من ناس ليها كل الحق تزعل لأن أنا شخصيا منزعج وبقيت ما باحبش أشوف صفحة البرنامج ولا فيديوهات البلاتوه طبعًا مع كل الاحترام للإعلان نفسه، وللمعلن لكن إنك تقطع عمل فني وتحشر فيه إعلان بالشكل ده.. عيب، ثالثًا.. كل يوم ناس كتير بتسألني البلاتوه فين.. وأنا ما كنتش عايز أرد احتراما للقناة اللي كانت سبب في ظهور أول برنامج تليفزيوني ليّا.. بس أنا كنت ساكت طول الفترة اللي فاتت عشان فيه ناس من فريق العمل ليهم مستحقات مالية ولسه لغاية النهارده ماخدوش فلوسهم (وأنا منهم) فكنت أتمنى إننا نرجع نشتغل لكن يبدو أن ما فيش فايدة".

واختتم بقوله: "أنا ممكن أتحمل كل المشكلات السابقة إلا إن الناس تبدأ تزعل من محتوى أنا تعبت فيه عشان يسعدهم ويرضيهم.. ادعولي أعرف أرجع أقدم اللي كنت باحبه زي ما كنت.. وأشكركم على صبركم علينا.. وباعتذر عن كل إساءة أو تأخير يا ريت القرار كان في إيدي.. لكن ما باليد حيلة.. وربنا يكتب لنا رزقنا في فرصة حلوة جديدة أعرف أعمل لكم حاجة تسعدكم".

المصدر التحرير الإخبـاري

إخترنا لك

أخبار ذات صلة

0 تعليق